Hvor er det sjovt..!

Hvað get ég sagt ykkur? Hmm...í seinustu viku hringdi Ási bróðir í mig og sagði að ég yrði að vera laus á laugardaginn og koma til Kaupmannahafnar. Hann vildi ekki segja mér af hverju. Ég sagðist auðvitað geta komið..og vildi náttúrulega ekki viðurkenna að ég væri að drepast úr forvitni. En það er ekkert nýtt að ég sé forvitin, held svei mér þá að það sé bara eitthvað ættgengt!  En svo kom að því, við vorum að fara til Malmø að skoða okkur um, versla og fara út að borða. Það er afmælisgjöfin frá Ása til mín í ár. Takk ástin:* Þetta var bara mjög góður dagur hjá okkur systkinunum! Ég færðist ennþá nær því að verða sett í skuldafangelsi á Íslandi þegar ég kem aftur til baka, og Ási fékk að kaupa sér Red Bull sem er víst ólöglegur í Danmörku, hann fann líka Red Delicious epli sem ekki eru seld í Danmörku og hann borðaði það með bestu lyst eins og má sjá á myndinni hér að neðan:
Vikan hefur svo bara liðið hægt og rólega, fékk reyndar viðvörun frá skólastjóranum fyrir lélega mætingu í tíma. Veit nú ekkert hvað hann meinar með því, er hann hræddur um að ég muni ekki kunna að föndra eftir að hafa misst af einum tíma eða að ég gæti hugsanlega ekki getað málað mynd af epli eftir að hafa stolist að versla með stelpunum í staðinn fyrir að mæta í myndlistartíma...det ved jeg slet ikke!

Jarle hefur svo verið í heimsókn hjá mér síðan á mánudag, erum búin að hafa það mjög gott og afar rólegt! Hann fer svo til Íslands á morgun að vinna meira á Reyðarfirði, sem er líklega bara tóm hamingja fyrir hann

Í dag var svo skyldu-dansæfing fyrir Gala-veislu sem er fljótlega. Við þurftum að dansa Lancier sem er hóp og paradans sem maður sér oft t.d í myndum frá viktoríutímanum, (þar sem allir hneigja sig og beygja, snúa sér í hringi og alls konar vesen!) ég tók mig klárlega mjög vel út í því. Er auðvitað búin að fá hellings æfingu eftir að ég og Elín (og tveir aðrir) vorum að gera dansvideo í kvikmyndagerð. Það er óskarinn fyrir það skal ég segja ykkur. Það verður sýnt á laugardaginn. Þá verður eimmitt Valgerður vinkona í heimsókn hjá mér og Elínu, hlakka ekkert smá til!

En eins og þið hafið lesið þá hef ég það mjög fínt þrátt fyrir skítakulda og snjó “þunga” hér í Danaveldi. En af Regínu er það að frétta að hún heldur að það sé þrír klukkutímar í sólarhringnum á norðurpólnum og ef maður biður Elínu að koma með íslensk orðatiltæki þá horfir hún á mann með skrítnum svip og segir “ha, tryllitæki”?? Þær eru klárlega búnar að drekka of mikið hérna...híhí..!

Vonandi nennir einhver að lesa þessa færslu, þetta er allt of langt..og líka með myndum..en endilega plís kommentið takk! Líka fólk sem ég þekki ekki takk! 

Hér er svo eimmitt mynd af mér á kaffihúsi í Malmø..

Kveðja frá Hillerød,

Ædís Teimisdottir ( þetta vilja danir endilega kalla mig..)